Phile | KMG | STEP |

FILEMOŊ

Philemon

Mumušâwe â jambuŋdâŋ

1 Paulo, Kristo Jesure kâpâcwâru ŋic no, â âgo-nâŋec Timoteo, nâhe Filemoŋ joroc babafic-nâhec gore papia ši râekoperec” 2 erâ wâc ŋokac âgo-nâhec Apia â momori âgo-nâhec Akipo, erâ Filemoŋ gore ficko mitire tumaŋneeŋgopieŋ ŋoŋere mâmâc râekoperec. 3 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.

Paulo e Anutu Filemoŋte erâ daŋge nunumu ecnewec

4 No nunumuo gore manasuhuc sâc Anutu-nane daŋge âzâcneekopac. 5 Go Wofuŋ Jesurao â mitiŋic jaŋerao maŋge domakac â jaŋere mamanac juekic irec biŋe manakopac hâcne. 6 Eme go mamanasiŋko nâŋehec maŋ mocjaha emeŋte wiac biaŋne Kristoraonec fua-nârewec fokac i sasawa mana taracmurâ numuekopac. 7 Âgo-nane,go mitiŋic bubiaŋ qajareekomec, irec no maŋjauŋgere bunane urueme wemo afecne šeri epo.

Kiŋaŋ qaqa Onesimo ere dâŋ

8 Go wiac ecmurâ i no Kristore micte mupaŋke-garezo murâ sâcne afeckerâ ezapo, 9 erâ sifu maŋjauŋte erâ mâc mu hemunaŋ egarehuc mupe” ŋicqizec Paulo no hâcne, erâ dameŋ ši wâc Kristo Jesure kâpâcwâru ŋic epozi, 10 no motec-mae Onesimo, kâpâcwâru ficko juhape fua-narewec, ere gazakopac. 11 E mârâcko jugareme mi sâckewec, ši ine no â go mâmâc junâcteme sâckekac. 12 Buhândâŋ-nane e hâcne sifu bârisie-garepe fakac 13 No Biŋebiaŋte erâ kâpâcwâru ficko ŋehape gore âkehoc kiŋaŋ qanareocte sakarezo mupo. 14 Erâ go mi manahaŋtecne sakarepe urucko mâcne, jâiŋko qikiŋne-narezicte manabâc ehuc bârisie-garekopac. 15 Behecgume e tâmiric piticne jumeŋ, i fuŋne šiŋucte mecne, risie-garerâ gohec jusanaŋkeocte. 16 Kiŋaŋ qaqage sawa mâcne, mitio âgoge erâ juocte fagarekac. No hâcne iŋucne junarewec, â go ine fehuc jugareocmu i šiŋucte: Sahaczi gore juweczi Wofuŋte erâ bufuŋge ekac. 17 Go nore manatec âgoge ekopacko ine e hefârockehuc manatec Paulo hefârockekopac ezejec. 18 Wiac moc sipiricke-garewecko me tofage moc erao fokacko ine nore muzemec. 19 Paulo no hâcne ši qâreŋke-garekopac, okacne bazu-garepemu. No nahacne tofa wâc gorao kâcɋene fokac, noraonec hâcne fuameŋ i” erâ irec wemocte boc mupemu. 20 Âgo-nane, go Wofuŋte erâ wiac buafec tahacnucmurâ enarekac. Kristore erâ bubiaŋ qanarezemec.

Mumutara dâŋ

21 Go micrereŋge fokac i manahuc dâŋ ši qâreŋke-garekopac. Erâ manakopac, gazakopac i sawa mi ehuc maŋgere gâcne šuhuckecmu. 22 Ŋoŋe nunumuzi bataracnupie Wofuŋzi no bâriesiecnu-ŋareme fâpemurâ mukopac, eme go irec ŋeŋe hewâneŋke-narezemec.

23 Kristo Jesure kâpâcwâru ŋic âgo-nane Epafra e manasu-garekac. 24 Erâ babaficfâc-nane Mareko, Aristako, Dema â Luka jaŋe iŋuc jaha manasu-gareŋgopieŋ. 25 Wofuŋ Jesu Kristo ere aki anonoczi maŋŋeŋicko fozejec.